វត្តមានប៉មចម្រោះទឹកស្អាតAquatowerក្នុងខេត្តព្រះសីហនុ
ក្រសួងបរិស្ថាន និងក្រុមហ៊ុនភេសជ្ជៈកម្ពុជា កូកា-កូឡា សហការយ៉ាងស្អិតរមួតក្នុងគម្រោង «ប្រើប្រាស់ទឹកស្អាត បន្ទប់ទឹកស្អាត សាលារៀនគំរូ ដែលហៅជាភាសាបរទេសថា AuquaTower-AquaSan & Clean School’s Toilet» ដែលមានទិសដៅសំខាន់ផ្តោតលើសុខមាលភាពរបស់ប្រជាសហគមកម្ពុជា ដោយយើងគួរតែចាប់ផ្តើមពីការប្រើប្រាស់ទឹកស្អាតមានសុវត្ថិភាព និងបន្ទប់ទឹកស្អាតក្នុងសាលារៀន។ ពិធីនេះបានធ្វើឡើងនៅក្នុងបរិវេណវិទ្យាល័យក្រុងព្រះសីហនុ នៃក្រុងព្រះសីហនុ ខេត្តព្រះសីហនុ ដែលអាចផ្តល់នូវទឹកស្អាតសម្រាប់ទទួលទាន ដល់សិស្សានុសិស្ស លោកគ្រូ អ្នកគ្រូប្រមាណជាង ១០០០ នាក់ ក៏ដូចជាប្រជាពលរដ្ឋដែលរស់នៅក្នុងសហគមន៍ជុំវិញនោះផងដែរ។
នៅក្នុងពិធីសម្ពោធនេះ មានការចូលរួមជាអធិបតីពី ឯកឧត្តម ជួប ប៉ារីស៍ អគ្គនាយកចំណេះដឹង និងព័ត៌មានបរិស្ថាន និង លោករស់ សោភា នាយកផ្នែកច្បាប់ និងទំនាក់ទំនងកិច្ចការសាធារណៈប្រចាំប្រទេសនៃក្រុមហ៊ុនភេសជ្ជៈកម្ពុជា (កូកា-កូឡា)។ លោករស់ សោភា បានមានប្រសាសន៍ថា «គម្រោងនេះ គឺជាផ្នែកមួយនៃចក្ខុវិស័យអាទិភាពជាសកលរបស់កូកា-កូឡា ក្រោមគម្រោងឈ្មោះថា «ការគ្រប់គ្រងទឹក ឬ Water Stewardship» ដែលមានឆន្ទៈព្រមជាមួយនឹងការប្តេជ្ញាយ៉ាងមុតមាំចំពោះគោលដៅចម្បង ៣ គឺ សន្សំសំចៃទឹកក្នុងផលិតកម្ម ធ្វើប្រព្រឹត្តកម្មចម្រោះទឹកសំណល់មុននឹងបង្ហូរបញ្ចេញទៅស្ទឹងបឹងបួរ និងប្រគល់ត្រឡប់ទៅឲ្យសហគមន៍វិញ នូវតំណក់ទឹកស្អាតមានសុវត្ថិភាពអាចពិសាបានភ្លាមៗ ដែលស្មើនឹងចំនួនតំណក់ទឹកដែលយើងបានប្រើប្រាស់ក្នុងការផលិតផលិត ផលភេសជ្ជៈរបស់យើង។»
លោក រស់ សោភា បានបន្តទៀតថា «ក្រុមហ៊ុន កូកា-កូឡា មានមោទនភាពដែលបានចូលរួមចំណែកក្នុងការបង្កើតគម្រោងដ៏មានសារៈសំខាន់មួយនេះ ដែលបានកំពុងតែនាំយក ទឹកស្អាត បន្ទប់ទឹកស្អាត មកកាន់សាលារៀន និងសហគមន៍ជាច្រើននៅទូទាំងពិភពលោក»។
សូមជម្រាបថា នេះគឺជាប៉មចម្រោះទឹកទី ២៥ បើគិតចាប់តាំងពីឆ្នាំ២០១៦ ដែលបានដំឡើងនៅទូទាំងព្រះរាជាណាចក្រកម្ពុជា ក្រោមកិច្ចសហការជាមួយអង្គការPlanet Water និងដៃគូនានា។ ប៉បចម្រោះទឹកនីមួយៗ អាចផ្គត់ផ្គង់ទឹកស្អាតបានជាង ១០០០ លីត្រ ក្នុងមួយម៉ោង ដែលបំពាក់ដោយប្រព័ន្ធចម្រោះ Ultra-Filtration technology របស់សហរដ្ឋអាមេរិក និងផ្គុំដោយក្បាលរ៉ូបីណេទឹកចំនួន៦ ប្រព័ន្ធអនាម័យសាប៊ូលាងដៃចំនួន ៣ ក៏ដូចជាម៉ាស៊ីនបាញ់ជម្រះបន្ទប់ទឹកហៅថា AquaSan ដើរដោយបន្ទះសូឡា ដែលនឹងជួយសម្រួលដល់សិស្សានុសិស្សក្នុងការសំអាតបន្ទប់ទឹក ស្របតាមគោលដៅរបស់សាលា ដើម្បីអនុវត្តបន្ទប់ស្អាត សាលារៀនគំរូ។ អង្គការមូលនិធិ Planet Water នឹងធ្វើលំហែទាំរយៈពេល ៥ ឆ្នាំ រាប់ចាប់ពីថ្ងៃដំឡើង ដោយផ្តោតទៅលើការត្រួតពិនិត្យគុណភាព សុវត្ថិភាពទឹក ។
ក្រុមការងារនឹងបន្តតម្លើងប៉មចម្រោះទឹកស្អាតចំនួន ៦ទៀត នៅទូទាំងប្រទេសកម្ពុជា ក្នុងឆ្នាំ ២០២០នេះ ហើយប៉មចម្រោះទឹកស្អាតជាច្រើនទៀត នឹងមានវត្តមាននៅក្នុងឆ្នាំបន្តបន្ទាប់ទៀត។ គិតមកត្រឹមថ្ងៃនេះ ក្រុមហ៊ុនបានផ្តល់ទឹកស្អាតដល់សហគមន៏តាមរយៈគម្រោងនេះ បរិមាណទឹកស្មើរនឹង ៨៨ លាន លីត្រ ដល់ប្រជាសហគមប្រមាណជាង ៦៩ ៨៣៧ នាក់ (ប្រាំមួយម៉ឺនប្រាំបួនពាន់ប្រាំបីរយសាមសិបប្រាំពីរ) រួមទាំងសិស្សានុសិស្ស អ្នកគ្រូលោកគ្រូផងដែរ។ តួលេខនេះ ត្រូវបានរំពឹងថា នឹងកើនឡើងបន្ថែមទៀតក្នុងឆ្នាំនេះ តាមរយៈការដំឡើងប៉មចម្រោះទឹកស្អាតចំនួន ៦បន្ថែមទៀតក្នុងឆ្នាំ ២០២០នេះ។
