ក្រុមហ៊ុនភេសជ្ជៈកម្ពុជា (កូកា-កូឡា) គឺជាផ្នែកដ៏សំខាន់មួយនៃអាជីវកម្មសកលរបស់ក្រុមហ៊ុន
កូកា-កូឡា ដែលធ្វើប្រតិបត្តិការនៅក្នុងប្រទេស និងនៅគ្រប់សហគមន៍ទាំងអស់ដែលយើងធ្វើអាជីវកម្ម។ យើងមានសមត្ថភាពអាចពង្រីកអាជីវកម្មឱ្យឈានទៅដល់ទីផ្សារពិភពលោកដោយ
ផ្តោតការយកចិត្តទុកដាក់ទៅលើប្រតិបត្តិការក្នុងស្រុកបាន ដោយសារចំណុចខ្លាំងនៃប្រព័ន្ធ កូកា-កូឡា ដែលមានក្រុមហ៊ុន កូកា-កូឡា និងក្រុមហ៊ុនជាដៃគូផលិតចំនួន 225 ក្រុមហ៊ុន នៅទូទាំង
ពិភពលោក រួមទាំងក្រុមហ៊ុន ភេសជ្ជៈកម្ពុជា (កូកា-កូឡា) ផងដែរ។
មនុស្សជាច្រើនយល់ឃើញថា ក្រុមហ៊ុនរបស់យើងគ្រាន់តែជា “ក្រុមហ៊ុន កូកា-កូឡា” តែប៉ុណ្ណោះ ប៉ុន្តែរចនាសម្ព័ន្ធរបស់យើងមានប្រតិបត្តិការតាមរយៈបណ្តាញក្នុងស្រុកជាច្រើន។ វិធីសាស្រ្តចម្បងសម្រាប់ការនាំយកផលិតផលរបស់យើងទៅកាន់ទីផ្សារគឺ ចាប់ផ្តើមតាមរយៈក្រុមហ៊ុនកូកា-កូឡា ដែលផលិត និងលក់វត្ថុធាតុដើម រូបមន្តផលិតពិសេស ក៏ដូចជាទឹកសេរ៉ូ ទៅឱ្យក្រុមហ៊ុនបុត្រសម្ព័ន្ធ ពោលគឺក្រុមហ៊ុនភេសជ្ជៈកម្ពុជា (កូកា-កូឡា)។ ក្រុមហ៊ុន កូកា-កូឡា ក៏ជាម្ចាស់ម៉ាកយីហោទាំងនេះហើយក៏ទទួលខុសត្រូវផ្ទាល់លើគំនិតផ្តួចផ្តើមថ្មីៗផងដែរ ដើម្បីធ្វើយ៉ាងណាឱ្យទីផ្សារម៉ាកយីហោនីមួយៗមានភាពល្បីល្បាញនៅក្នុងចំណោមអ្នកពិសាភេសជ្ជៈទាំងអស់។
ក្រុមហ៊ុនភេសជ្ជៈកម្ពុជា (កូកា-កូឡា) ផលិត វេចខ្ចប់ ស្វែងរកទីផ្សារ និងចែកចាយភេសជ្ជៈដែលជាផលិតផលសម្រេចចុងក្រោយ ទៅដល់អតិថិជន និងដៃគូពាណិជ្ជកម្មនានា ដែលបន្ទាប់មក ដៃគូពាណិជ្ជកម្មទាំងនោះធ្វើការលក់ផលិតផលរបស់យើងជូនដល់អតិថិជនដែលជាអ្នកពិសា។
ក្នុងខែមករា ឆ្នាំ2006 ក្រុមហ៊ុនភេសជ្ជៈកម្ពុជា (កូកា-កូឡា) រួមជាមួយក្រុមហ៊ុនច្រកភេសជ្ជៈរបស់ក្រុមហ៊ុន កូកា-កូឡា ផ្សេងទៀតបានរួមគ្នាបង្កើតជា ក្រុមហ៊ុនវិនិយោគកូកា-កូឡា Bottling Investments Group ឬ BIG។ ក្រុមហ៊ុន BIG ត្រូវបានបង្កើតឡើងដើម្បីធានាថា ដំណើរការច្រកភេសជ្ជៈរបស់ក្រុមហ៊ុនទាំងនោះបានទទួលការវិនិយោគ និងជំនាញសមស្រប ដើម្បីធានាឱ្យមានភាពជោគជ័យរយៈពេលវែងនៅក្នុងការធ្វើប្រតិបត្តិការរបស់ខ្លួន។ តាមរយៈការវិនិយោគបែបយុទ្ធសាស្រ្តទៅលើដំណើរការច្រកភេសជ្ជៈមួយចំនួន និងការប្រើប្រាស់ភាពជាអ្នកដឹកនាំ រួមជាមួយនឹងធនធានរបស់ក្រុមហ៊ុន កូកា-កូឡា ក្រុមហ៊ុន BIG ជំរុញឱ្យមានកំណើនរយៈពេលវែងនៅក្នុងទីផ្សារសំខាន់ៗ និងដោះស្រាយបញ្ហាប្រឈមផ្នែករចនាសម្ព័ន្ធ ឬវិនិយោគចម្បងៗជាច្រើនទៀត។
នៅក្នុងជាង 200 ប្រទេសនៅលើពិភពលោក ក្រុមហ៊ុន កូកា-កូឡា លក់ភេសជ្ជៈចំនួនជាង 500 ម៉ាក គិតចាប់ពីភេសជ្ជៈមានជាតិហ្គាសដូចជាភេសជ្ជៈ កូកា-កូឡា ហ្វាន់តា និងស្ព្រៃ រហូតដល់ភេសជ្ជៈតែពិសេស ទឹកពិសា និងទឹកផ្លែឈើជាច្រើនមុខផ្សេងទៀតផងដែរ។ នៅក្នុងប្រទេសកម្ពុជា យើងផលិត និងចែកចាយផលិតផលចំនួន 10 ម៉ាកផ្សេងៗគ្នា ដែលមានទំហំ និងការវេចខ្ចប់ខុសៗគ្នា តាមរយៈបណ្តាញអ្នកបោះលក់ដុំ ដេប៉ូចែកចាយ និងដៃគូលក់រាយរបស់យើង។